السفيــــــــــــــــــــــــــــــــــــــر سالم



 
الرئيسيةالرئيسية  البوابةالبوابة  اليوميةاليومية  س .و .جس .و .ج  بحـثبحـث  الأعضاءالأعضاء  المجموعاتالمجموعات  التسجيلالتسجيل  دخولدخول  

شاطر | 
 

 ﻃﻖ ﺍﻟﺨﺒﺮ ﻣﺎﻟﻲ ﺍﻟﺒﻠﺪ

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
سالم محمد
Admin


المساهمات : 96
تاريخ التسجيل : 31/03/2012
العمر : 23

مُساهمةموضوع: ﻃﻖ ﺍﻟﺨﺒﺮ ﻣﺎﻟﻲ ﺍﻟﺒﻠﺪ    الأربعاء يوليو 25, 2012 6:38 pm

ﻭﺑﻼ ﺧﺒﺮ
ﻃﻖ ﺍﻟﺨﺒﺮ ﻣﺎﻟﻲ ﺍﻟﺒﻠﺪ
ﻗﺎﻟﻮﺍ ﺍﻟﻌﺮﻳﺲ ﻗﺎﻡ ﺑﺎﻷﺣﺪ
ﺍﻟﺤﻠﻲ ﺟﺎﻃﺖ ﻭﺍﻟﺤﺮﻳﻢ ﻳﺘﻬﺎﻣﺴﻦ
ﺟﺎﻱ ﺍﻟﻮﻟﺪ
ﻛﻮﻡ ﻣﻦ ﺑﻨﺎﺕ ﻟﻠﺒﻴﺮ ﻭﺭﺩ
ﻳﺘﺤﺪﺛﻦ ﺟﺎﻱ ﺍﻟﻮﻟﺪ
ﻳﺎ ﺑﺨﺘﻬﺎ ﻭﺍ ﺷﻮﻗﻨﺎ
ﻧﺤﻨﺎ ﺍﻟﻠﻴﻨﺎ ﺟﻤﺮ ﺍﻟﺸﻮﻕ ﻭﻗﺪ
ﻛﻞ ﺍﻟﺤﺪﻳﺚ ﺍﻟﻠﻴﻠﻲ ﻓﻮﻕ ﺑﺖ ﺍﻟﺒﻠﺪ
ﻻﻣﻦ ﺧﻼﺹ ﺍﻟﻠﻴﻞ ﺩﺧﻞ
ﺁﺧﺮ ﺷﻌﺎﻉ ﻣﻦ ﺍﻟﺸﻤﺲ ﺭﻭّﺡ ﻧﺰﻝ
ﺿﻮ ﺍﻟﻘﻤﻴﺮﻩ ﺟﺎ ﻣﻦ ﺑﻌﻴﺪ ﺑﻬﺮ ﻗﺪﻝ
ﺩﺍﻓﺮ ﻇﻼﻡ ﺍﻟﺤﻠﻲ ﻗﺪﺍﻣﻮﺍ ﻭﺻﻞ
ﻧﺎﺱ ﺍﻟﺒﻠﺪ ﺍﻟﻨﺎﻡ ﺭﻗﺪ
ﻭﺍﻟﻤﺎﺳﻚ ﺍﻟﺴﺒﺤﻪ ﻭﻋﺒﺪ
ﻣﺸﻐﻮﻝ ﻫﻮ
ﺑﺨﺒﺮ ﺍﻟﻌﺮﻳﺲ ﺍﻟﻘﺎﻟﻮﺍ ﻗﺎﻡ ﻳﻮﻡ ﺍﻷﺣﺪ
ﻭﻫﻨﺎﻙ ﺑﻌﻴﺪ ﺑﻲ ﻏﺎﺩﻱ ﻓﻲ ﺁﺧﺮ ﺍﻟﺪﻳﺎﺭ
ﺭﺍﻛﻮﺑﺔ ﺿﻠﻬﺎ ﺍﺣﺮ ﻣﻦ ﺣﺮ ﺍﻟﻨﻬﺎﺭ
ﻛﻮﻡ ﻣﻦ ﺑﺮﻭﺵ ﻭﺟﺮﻳﺪ ﺗﻤﺮ ﻋﻴﺪﺍﻥ
ﺻﻐﺎﺭ
ﻭﺩﻟﻮﻕ ﻫﺪﻭﻡ ﻣﻮﺭﻭﺛﺔ ﻣﻦ ﺯﻣﻦ ﺍﻟﻜﺒﺎﺭ
ﻭﺗﻼﺕ ﻋﻨﺎﻗﺮﻳﺒﺎ ﺻﻐﺎﺭ
ﻛﺮﺍﺑﺔ ﻣﺘﻘﻄﻊ ﻧﺰﻝ
ﻭﺍﻟﻨﻮﻡ ﻣﻦ ﺍﻟﺒﻴﻔﻮﻗﺎ ﺭﻭﺡ ﺗﺐ ﺟﻔﻞ
ﺭﺍﻗﺪ ﻫﻨﺎﻙ ﻛﻮﻡ ﻣﻦ ﺿﻴﺎﻉ
ﻣﺮﻛﺐ ﻣﺴﺎﻓﺮﻱ ﺑﻼ ﺷﺮﺍﻉ
ﺍﺣﻼﻡ ﻣﺴﺎﻓﺮﻱ ﺑﻼ ﻭﺩﺍﻉ
ﻭﺩﻣﻮﻉ ﺿﻴﺎﻉ ﺗﻨﺠﺎﺭﻯ
ﻣﻦ ﻏﻴﺮ ﺍﻧﻘﻄﺎﻉ
ﺍﺣﺮﻑ ﺃﻧﻴﻦ ﻣﺎ ﺧﻄﺘﻦ ﺍﻳﺪ ﺑﻲ ﻳﺮﺍﻉ
ﻭﻟﻴﻼ ﻧﺠﻮﻣﻮ ﻳﻮﺩﻋﻨﻮ
ﺧﻼﺹ ﻣﺴﺎﻓﺮﺍﺕ ﻫﻦ ﺳﺮﺍﻉ
ﺑﺖ ﺍﻟﺒﻠﺪ ﻋﺒﺮﺍﺗﺎ ﺳﺪﺕ ﻓﻲ ﺍﻟﺤﻠﻖ
ﺗﺒﻜﻲ ﻭﺗﻨﻮﺡ ﺗﺸﺮﺏ ﺩﻣﻮﻋﺎ ﻭﺗﻨﺸﺮﻕ
ﻻﻣﻦ ﺣﺴﻴﺲ ﻧﻘﺎﺭﺓ ﺟﺎﻫﺎ ﻣﻦ ﺍﻟﺸﺮﻕ
ﻗﺎﻣﺖ ﻣﻊ ﺍﻟﻠﻴﻞ ﺻﻨﻘﺮﺕ
ﻭﺑﻜﺖ ﺑﻜﺖ ﺷﺎﻟﺖ ﻃﺮﻳﺤﺘﺎ
ﻟﻠﺪﻣﻴﻌﺎﺕ ﻛﻔﻜﻔﺖ
ﻓﺠﺄﺓ ﺳﻨﻴﻦ ﺍﻟﻔﺎﺗﻮ ﺟﻦ
ﻭﺍﻳﺎﻡ ﺯﻣﺎﻥ ﺇﺗﻠﻤﻠﻤﻦ
ﻭﺍﺗﺬﻛﺮﺕ ﻛﺎﻧﺖ ﺗﻘﻮﻡ ﻓﺠﺮ ﺍﻟﺼﺒﺎﺡ
ﻟﻤﻦ ﻳﻘﻮﻡ ﺍﻫﻞ ﺍﻟﺼﻼﺡ
ﺍﺑﻮﻫﺎ ﺷﺎﻳﻞ ﺍﻟﺴﺒﺤﻲ ﺻﺎﺡ
ﻳﺎﺷﺎﻓﻌﻪ ﺳﻮﻱ ﺍﻟﺸﺎﻱ ﺳﺮﻳﻊ
ﺷﺪﻱ ﺍﻟﻤﻼﺡ
ﺷﻴﻠﻲ ﺍﻟﻤﻨﺎﺟﻞ ﻭﺍﻣﺸﻲ ﻗﺪﺍﻣﻲ ﺍﻟﺠﺮﻑ
ﺍﺗﺬﻛﺮﺕ ﻛﺎﻧﺖ ﺗﺴﺒﻘﻮ ﺗﻤﺸﻲ ﺗﻨﺰﻝ ﺑﻲ
ﺗﺤﺖ
ﺗﻤﺴﻚ ﺳﺒﻴﻂ ﺍﻟﺘﻤﺮﺓ ﺑﻲ ﺍﻳﺪﺍ ﻭﺗﺤﺖ
ﺗﻘﻌﺪ ﺗﺤﺶ ﺍﻟﻠﻮﺑﻲ ﻟﻠﻜﺎﻭﻳﻖ ﺗﻘﺶ
ﺗﺼﻞ ﺍﻟﺒﺤﺮ ﻭﺍﻟﻤﻮﺝ ﻳﺪﺍﻋﺒﺎ ﻓﻮﻕ ﻫﺪﻭﻣﺎ
ﻳﻨﻂ ﻳﺮﺵ
ﺑﻌﺪﻳﻦ ﺗﺸﻴﻞ ﺍﻟﻘﺶ ﺗﻔﻮﺕ
ﻭﺍﻟﻴﻮﻡ ﻳﻔﻮﺕ
ﻭﺗﻔﻮﺕ ﺳﻨﻴﻦ ﻭﺗﻤﺮ ﺳﻨﻴﻦ
ﻳﻜﺒﺮ ﻋﻤﻴﺮ ﺑﺖ ﺍﻟﺒﻠﺪ
ﻳﻜﺒﺮ ﻣﻌﺎﻫﻮ ﻛﻤﺎﻥ ﺣﻨﻴﻦ
ﻓﻲ ﻳﻮﻡ ﺻﺒﺎﺣﻮ ﺻﺒﺎﺡ ﻫﻨﺎ
ﻭﺍﺣﺔ ﻋﺒﻴﺮ ﻧﻐﻤﺔ ﻏﻨﺎ
ﺭﻳﺤﺔ ﻟﺒﻴﻨﻲ ﻣﻘﻨﻨﺔ
ﻣﺮ ﺍﻟﺠﻨﻰ ﻭﺳﻠﻢ ﻋﻠﻲ ﺑﺖ ﺍﻟﺒﻠﺪ
ﺯﻱ ﻋﺎﺩﺗﻮ ﺳﻠﻢ ﻭﺍﺑﺘﻌﺪ
ﺗﺎﺑﻌﺎﻫﻮ ﻋﻴﻦ ﺑﺖ ﺍﻟﺒﻠﺪ
ﺑﺖ ﺍﻟﺒﻠﺪ ﺳﻤﻌﺖ ﺿﺮﻳﺒﺎﺕ ﺍﻟﻘﻠﺐ
ﻳﺎ ﺍﻟﻠﻪ ﻣﺎﻟﻮ ﺩﻩ ﺍﻟﻘﻠﺐ
ﺑﻌﺪ ﺍﻟﺜﺒﺎﺕ ﻛﺒﻔﻦ ﺧﺮﺏ
ﺑﺖ ﺍﻟﺒﻠﺪ ﻋﺮﻓﺖ ﺗﺤﺐ
ﻭﺍﻟﻴﻮﻡ ﺩﺍﻙ ﺑﺖ ﺍﻟﺒﻠﺪ ﻣﺎ ﺟﺎﻫﺎ ﻧﻮﻡ
ﻣﺎﺩﺍﻡ ﺧﻴﺎﻝ ﻭﺩ ﺍﻟﺒﻠﺪ ﻳﻤﺸﻲ ﻭﻳﺤﻮﻡ
ﺑﻴﻦ ﺍﻟﺨﻴﺎﻝ ﺷﺎﻓﺖ ﻭﺟﻴﻬﻮ ﺍﻟﻬﺎﺵ ﻭﺑﺎﺵ
ﺷﺎﻓﺖ ﻋﻴﻮﻧﻮ ﺍﻟﻔﻴﻬﺎ ﻓﻴﺾ ﺍﺣﻼﻣﺎ ﻋﺎﺵ
ﺷﺎﻓﺖ ﺳﺤﺎﺏ ﺍﻟﺮﻳﺪﺓ ﻓﻮﻕ ﻭﺍﺩﻳﻬﺎ ﺭﺍﺵ
ﺑﺖ ﺍﻟﺒﻠﺪ ﺗﺎﻫﺖ ﻣﻊ ﺍﻟﺸﻮﻕ ﺍﻟﻤﺎ ﻋﺎﺩ
ﻳﻨﻜﺘﻢ
ﻭﺍﻟﺼﻮﺭﻩ ﻫﺎ ﺩﻱ ﻓﻲ ﻗﻠﻴﺒﺎ ﺑﺘﺘﺮﺳﻢ
ﺇﺳﻤﻮ ﺍﻟﻌﻠﻲ ﻧﻮﻧﺔ ﺧﺪﻳﺪﺍ ﺻﺒﺢ ﻭﺳﻢ
ﺗﺎﻫﺖ ﻣﺸﺖ ﺳﺎﻳﻘﺎﻫﺎ ﺩﻗﺎﺕ ﺍﻟﺪﻟﻴﺐ
ﻟﻲ ﺩﺍﺭ ﺣﺒﻴﺒﻪ ﻣﻨﻰ ﺍﻟﻘﻠﻴﺐ
ﻟﻲ ﻗﻌﺪﻩ ﻋﺼﺮﺍﻭﻳﻪ ﻓﻮﻕ ﺍﻟﻌﻨﻘﺮﻳﺐ
ﻟﻠﻮﻧﺴﻲ ﻭﺍﻟﺨﺎﻃﺮ ﻳﻄﻴﺐ
ﻟﻲ ﻣﺴﻜﻪ ﻓﻲ ﺇﻳﺪ ﺍﻟﺤﺒﻴﺐ
ﺍﻟﻮﻗﻔﻪ ﻗﺪﺍﻡ ﺍﻟﺠﻨﺎﺕ
ﺍﻟﻘﺮﻣﺼﻴﺺ ﻭﻏﻨﻰ ﺍﻟﺒﻨﺎﺕ
ﻳﺎﻟﻠﻪ ﻭﻳﻦ ﺗﻠﻘﻰ ﺍﻟﺜﺒﺎﺕ
ﻭﺍﻟﺼﻔﻘﻪ ﻣﻦ ﺗﺎﻝ ﺍﻟﻮﻻﺩ
ﻣﺎ ﺑﺘﺴﻤﻌﺎ ﻭﺟﺎﻳﺎﻫﺎ ﻣﻦ ﺁﺧﺮ ﺑﻼﺩ
ﺍﺗﺬﻛﺮﺕ ﻛﺒﻒ ﺣﺎﺝ ﻣﺤﻤﺪ ﻭﺍﻟﺪﺍ
ﺣﺎﻟﻒ ﻳﻤﻴﻦ ﻭﺩ ﺍﻟﺒﻠﺪ ﻣﺎ ﻳﺎﺧﺪﺍ
ﻟﻮ ﻛﺎﻥ ﺭﻛﻊ ﻗﺪﺍﻣﺎ ﺻﻠﻰ ﻭﻳﻌﺒﺪﺍ
ﺃﺗﺬﻛﺮﺕ ﻛﻴﻒ ﺣﺎﺝ ﻣﺤﻤﺪ ﻭﺍﻟﺪﺍ
ﻗﺎﻝ ﻟﻴﻬﺎ ﻣﺎ ﻋﻨﺪﻙ ﺃﺩﺏ
ﺗﻌﺒﺎﻥ ﺳﻨﻴﻦ ﻓﻮﻗﻚ ﺗﻌﺐ
ﻭﺍﺩﻳﻜﻲ ﻟﻲ ﺯﻭﻻً ﻛﻌﺐ
ﺗﺮﺑﺎﻝ ﻭﻋﻴﺸﺘﻮ ﻋﺪﻡ ﻋﺪﻡ
ﻟﻮ ﻗﺎﺭﻱ ﻟﻮ ﻣﺎﺳﻚ ﻗﻠﻢ
ﺗﺎﺧﺪﻳﻪ ﺗﻨﺪﻣﻲ ﺻﺢ ﻧﺪﻡ
ﻳﺸﻘﻴﻜﻲ ﻳﻮﺭﻳﻜﻲ ﺍﻻﻟﻢ
ﻭﺍﺗﺬﻛﺮﺕ ﻛﻴﻒ ﺣﺎﺝ ﻣﺤﻤﺪ ﻭﺍﻟﺪﺍ
ﻭﺻﻒ ﺍﻟﻌﺮﻳﺲ ﺍﻟﺠﺎﻱ ﺑﻲ ﻗﻄﺮ ﺍﻻﺣﺪ
ﻛﺘﺮ ﻣﺤﺎﺳﻨﻮ ﻭﻋﺪﺩﺍ
ﺭﺍﺟﻞ ﻣﻮﻇﻒ ﻋﻨﺪﻭ ﻣﺎﻝ
ﻳﺄﻭﻳﻜﻲ ﻓﻲ ﺑﻴﺖ ﺍﻟﺤﻼ ﻝ
ﺗﺒﻘﻴﻠﻮﺍ ﻟﻲ ﺍﻣﻮ ﺍﻟﻌﻴﺎﻝ
ﻭﺍﺗﺬﻛﺮﺕ ﻻﻣﻦ ﺍﺑﺖ
ﻗﻮﻝ ﺣﺎﺝ ﻣﺤﻤﺪ ﻭﺍﻟﺪﺍ
ﻛﻴﻒ ﻧﻬﺮﺍ ﻭﺣﺎﻟﻒ ﻳﻤﻴﻦ ﺑﻴﻮﺩﺭﺍ
ﻟﻮ ﻣﺎﺭﺿﺖ ﺑﺎﻟﺠﺎﻱ ﺑﻲ ﻗﻄﺮ ﺍﻷﺣﺪ
ﺇﺗﺬﻛﺮﺕ ﻛﻴﻒ ﺍﻟﺤﺒﻴﺐ ﻭﺩ ﺍﻟﺒﻠﺪ
ﻓﻲ ﺍﻟﻐﺮﺑﻪ ﺭﻭّﺡ ﻭﺇﺑﺘﻌﺪ
ﻭﺑﻜﺖ ﺑﻜﺖ ﺑﺖ ﺍﻟﺒﻠﺪ
ﻟﻤﺎ ﺍﻟﺨﺒﺮ ﺯﺍﻉ ﻓﻲ ﺍﻟﺒﻠﺪ
ﺇﻧﻮ ﺍﻟﻌﺮﻳﺲ ﻗﺎﻡ ﺑﺎﻷﺣﺪ
ﺍﻟﺤﻠﻲ ﺟﺎﻃﺖ ﻭﺍﻟﺤﺮﻳﻢ ﻳﺘﻬﺎﻣﺴﻦ
ﺟﺎﻱ ﺍﻟﻮﻟﺪ
ﻛﻮﻡ ﻣﻦ ﺑﻨﺎﺕ ﻟﻠﺒﻴﺮ ﻭﺭﺩ
ﻳﺘﺤﺪﺛﻦ ﺟﺎﻱ ﺍﻟﻮﻟﺪ
ﻳﺎ ﺑﺨﺘﻬﺎ ﻭﺍ ﺷﻮﻗﻨﺎ
ﻧﺤﻨﺎ ﺍﻟﻠﻴﻨﺎ ﺟﻤﺮ ﺍﻟﺸﻮﻕ ﻭﻗﺪ
ﻟﻜﻨﻬﻦ ﻣﺎ ﻋﺮﻓﻦ ﺍﻟﺸﻮﻕ ﻛﻴﻒ ﻭﻗﺪ
ﻭﻣﺎ ﻋﺮﻓﻦ ﺍﻧﻮ ﻫﻲ ﺷﻮﻗﺎ ﺗﺐ ﻣﺎﻟﻴﻬﻮ ﺣﺪ
ﻣﻮ ﻟﻴﺲ ﻟﻠﻌﺮﻳﺲ ﻟﻴﻬﻮ ﺍﻟﺤﺒﻴﺐ ﻭﺩ ﺍﻟﺒﻠﺪ
ﺩﻩ ﺍﻟﺮﺍﺡ ﻭﻓﻲ ﺯﺣﻤﺔ ﺿﻴﺎﻉ ﻫﻮ ﻣﺎ ﺍﺗﻮﺟﺪ
ﻳﺎ ﺣﻠﻴﻠﻚ ﺍﻧﺖ ﻳﺎ ﺑﺖ ﺍﻟﺒﻠﺪ
ﻭﻳﺎ ﺣﻠﻴﻠﻚ ﺍﻧﺖ ﻳﺎ ﺑﺖ ﺍﻟﺒﻠﺪ
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://smsa.yoo7.com
 
ﻃﻖ ﺍﻟﺨﺒﺮ ﻣﺎﻟﻲ ﺍﻟﺒﻠﺪ
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
السفيــــــــــــــــــــــــــــــــــــــر سالم :: الثقافة :: القسم الادبى-
انتقل الى: